ରାୟଗଡ଼ା ବ୍ୟାଗ୍‌ରେ ବନ୍ଧା ମୃତଦେହ ରହସ୍ୟ ପର୍ଦ୍ଦାଫାସ: ଆନ୍ଧ୍ରରୁ ଅଭିଯୁକ୍ତ ପ୍ରେମିକ ଗିରଫ

ରାୟଗଡ଼ାର ବହୁଚର୍ଚ୍ଚିତ ବ୍ୟାଗ୍‌ରେ ବନ୍ଧା ମୃତଦେହ ରହସ୍ୟ ପର୍ଦ୍ଦାଫାସ

ଆନ୍ଧ୍ରରୁ ଅଭିଯୁକ୍ତ ଗିରଫ

ପ୍ରେମ ଜାଲରେ ଫସାଇ ଶାରୀରିକ ସମ୍ପର୍କ ଓ ପରେ ହତ୍ୟା

ରାୟଗଡ଼ା, ୩୧/୭ (ଓ-ଖବର)-ରାୟଗଡ଼ା ଜିଲ୍ଲା ଚାନ୍ଦିଲି ଥାନା ଅଞ୍ଚଳରେ ଘଟିଥିବା ବହୁଚର୍ଚ୍ଚିତ ମହିଳା ହତ୍ୟାକାଣ୍ଡର ରହସ୍ୟ ଉପରୁ ପରଦା ହଟାଇଛି ପୋଲିସ। ଏନେଇ ଶୁକ୍ରବାର ରାୟଗଡ଼ା ଏସପି ରାଜ ପ୍ରସାଦ ଜିଲ୍ଲା ପୋଲିସ କାର୍ଯ୍ୟଳୟରେ ଆୟୋଜିତ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି। ଦୀର୍ଘ ଗୋଟିଏ ମାସର କଠିନ ତଦନ୍ତ ପରେ ଆନ୍ଧ୍ରପ୍ରଦେଶରୁ ଅଭିଯୁକ୍ତ ବିବାହିତ ପ୍ରେମିକକୁ ଗିରଫ କରି କୋର୍ଟଚାଲାଣ କରାଯାଇଛି। ଗିରଫ ଅଭିଯୁକ୍ତ ଜଣକ ହେଲେ ଆନ୍ଧ୍ରପ୍ରଦେଶ ବିଶାଖାପାଟଣା ନଗର ପୋଲିସ୍ କମିଶନରେଟ୍ ଅନ୍ତର୍ଗତ କଞ୍ଚାରପାଲେମ୍ ଗାଙ୍ଗନ୍ନା ନଗରର ବୋଲିସେଟି ସୁରେଶ କୁମାର (୩୦)। ସୂଚନା ଥାଉକି, ଗତ ଜୁନ୍ ୧୭ ତାରିଖରେ ରାୟଗଡ଼ାସହର ନିକଟସ୍ଥ ଖଲିଗୁଡ଼ା ସ୍ଥିତ ହ୍ୟୁଣ୍ଡାଇ ଶୋ’ରୁମ୍ ମ୍ୟାନେଜରଙ୍କ ନିକଟରୁ ସୂଚନା ପାଇ ଚାନ୍ଦିଲି ପୋଲିସ ଶୋ'ରୁମ୍ ନିକଟସ୍ଥ ଖାଲି ଜମିରୁ ଏକ ଦୁର୍ଗନ୍ଧଯୁକ୍ତ ବ୍ୟାଗ୍ ଉଦ୍ଧାର କରିଥିଲା। ବ୍ୟାଗ୍ ଖୋଲିବା ପରେ ସେଥିରୁ ଜଣେ ଅଜଣା ଯୁବତୀଙ୍କ ଗଳିତ ମୃତଦେହ ମିଳିଥିଲା। ଏ ନେଇ ଚାନ୍ଦିଲି ଥାନାରେ କେସ୍ ନଂ ୧୯୮ରେ ମାମଲା ରୁଜୁ କରାଯାଇ ତଦନ୍ତ ଆରମ୍ଭ ହୋଇଥିଲା। ତେବେ ମୃତ ଯୁବତୀଙ୍କ ପରିଚୟ ନ ମିଳିବାରୁ ସୋସିଆଲ୍ ମିଡିଆ ଓ ଗଣମାଧ୍ୟମରେ ପୋଲିସ ପକ୍ଷରୁ ଫଟୋ ପ୍ରସାରଣ କରାଯାଇଥିଲା। କୌଣସି ଦାବିଦାର ନ ଆସିବାରୁ ଆଇନଗତ ପ୍ରକ୍ରିୟା ପୂରଣ ପୂର୍ବକ ଡିଏନ୍‌ଏ ଓ ଜୈବିକ ନମୁନା ସଂରକ୍ଷିତ ରଖି ଶବର ସତ୍କାର କରାଯାଇଥିଲା। ଏହି ଘଟଣାର ତଦନ୍ତ ପାଇଁ ସିଡବ୍ଲ୍ୟୁଆର୍‌ ରେଞ୍ଜ ଡିଆଇଜି, କ୍ରାଇମ୍ ବ୍ରାଞ୍ଚ ଏବଂ ସିଏଡବ୍ଲ୍ୟୁ ର ପ୍ରତ୍ୟକ୍ଷ ତତ୍ତ୍ୱାବଧାନରେ ରାୟଗଡ଼ା ପୋଲିସ ଏକ ଟିମ୍ ଗଠନ କରିଥିଲା। ରାୟଗଡ଼ା ସହର ଓ ଚାନ୍ଦିଲି ଅଞ୍ଚଳର ସମସ୍ତ ସିସିଟିଭି ଫୁଟେଜ୍ ଯାଞ୍ଚ କରିବା ପରେ ଏକ ସନ୍ଦିଗ୍ଧ ବ୍ୟକ୍ତିର ଗତିବିଧି ନଜରକୁ ଆସିଥିଲା। ରାୟଗଡ଼ା ସାଇବର ସେଲ୍‌ର ସହାୟତାରେ ପୋଲିସ ଅଭିଯୁକ୍ତର ଯାତାୟାତ ରୁଟ୍ ଟ୍ରାକ୍ କରି ଆନ୍ଧ୍ରପ୍ରଦେଶରୁ ରାୟଗଡ଼ା ପର୍ଯ୍ୟନ୍ତ ଗତିବିଧିର ଲିଙ୍କ୍ ଖୋଜି ବାହାର କରିଥିଲା। ତେବେ ଗତ ଜୁଲାଇ ୩୦ ତାରିଖ ସନ୍ଧ୍ୟାରେ ପୋଲିସ ଅଭିଯୁକ୍ତ ସୁରେଶ କୁମାରକୁ ଗିରଫ କରିବା ପରେ ସେ ନିଜର ଅପରାଧ ସ୍ୱୀକାର କରିଛି। ମୃତ ଯୁବତୀ ଜଣକ ଆନ୍ଧ୍ରପ୍ରଦେଶ ବିଜୟୱାଡ଼ା ଅଞ୍ଚଳର ଏବଂ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଥିଲା। ଯୁବତୀ ଜଣକ ବିବାହ କରିବା ପାଇଁ ଜିଦ୍ ଧରିବାରୁ ସୁରେଶ ତାଙ୍କୁ ସଂଘାତିକ ଆକ୍ରମଣ କରି ହତ୍ୟା କରିଥିଲା। ପରେ ଶବକୁ ବ୍ୟାଗ୍‌ରେ ପୁରାଇ ଗାଡ଼ି ମାଧ୍ୟମରେ ଆନ୍ଧ୍ରପ୍ରଦେଶରୁ ଆଣି ରାୟଗଡ଼ାରେ ଫିଙ୍ଗି ଦେଇ ଫେରାର୍ ହୋଇଯାଇଥିଲା। ଅଭିଯୁକ୍ତକୁ କୋର୍ଟଚାଲାଣ କରାଯାଇ ବିଚାରବିଭାଗୀୟ ହାଜତକୁ ପଠାଯାଇଛି। ମାମଲାର ଅଧିକ ଫୋରେନ୍‌ସିକ୍ ଯାଞ୍ଚ ଏବଂ ଅଧିକ ପ୍ରମାଣ ସଂଗ୍ରହ ପ୍ରକ୍ରିୟା ଜାରି ରହିଥିବା ରାୟଗଡ଼ା ଏସପି ରାଜ ପ୍ରସାଦ ସୂଚନା ଦେଇଛନ୍ତି। ଏହି ସାମ୍ବାଦିକ ସମ୍ମିଳନୀରେ ରାୟଗଡ଼ା ଏସଡିପିଓ ଗୌରହରି ସାହୁ, ଚାନ୍ଦିଲି ଥାନା ଆଇଆଇସି ଉତ୍ତମ କୁମାର ସାହୁ ଓ ଏସଆଇ ଆଶୁତୋଷ ସାହୁ ପ୍ରମୁଖ ଉପସ୍ଥିତ ଥିଲେ।