ରାୟଗଡ଼ାରେ ସରକାରୀ ବୋଲେରୋ ଧକ୍କାରେ ଦ୍ୱିତୀୟ ଶ୍ରେଣୀ ଛାତ୍ରଙ୍କ ମୃତ୍ୟୁ; ଚିକିତ୍ସାଳୟରେ ଛାଡ଼ି ଡ୍ରାଇଭର ଫେରାର

ରାୟଗଡ଼ା,୧୯/୮(ଓ-ଖବର)- ସ୍କୁଲ ଛୁଟି ପରେ ରାସ୍ତା ପାର ହେଉଥିବା ବେଳେ ଏକ ସରକାରୀ ବୋଲେରୋ ଧକ୍କାରେ ଜଣେ ଦ୍ୱିତୀୟ ଶ୍ରେଣୀ ଛାତ୍ରଙ୍କର ମୃତ୍ୟୁ ଘଟିଛି। ମୃତ ଛାତ୍ର ଜଣକ ହେଲେ ରାୟଗଡ଼ା ସଦର ଥାନା ଅନ୍ତର୍ଗତ ସିରିଗୁଡ଼ା ଗ୍ରାମର ପୂର୍ଣ୍ଣଚନ୍ଦ୍ର ବିଡିକା (୮)।

ମିଳିଥିବା ସୂଚନା ଅନୁସାରେ, ପୂର୍ଣ୍ଣଚନ୍ଦ୍ର ସ୍ଥାନୀୟ ବିଦ୍ୟୁତ କଲୋନୀ ସ୍କୁଲରେ ପାଠ ପଢ଼ୁଥିଲେ। ସ୍କୁଲ ଛୁଟି ହେବା ପରେ ସାଙ୍ଗମାନଙ୍କ ସହ ଜାତୀୟ ରାଜପଥ ପାର ହୋଇ ଘରକୁ ଫେରୁଥିବା ସମୟରେ ସାମ୍ନା ପଟୁ ଦ୍ରୁତ ଗତିରେ ଆସୁଥିବା ଏକ ସରକାରୀ ବୋଲେରୋ ତାଙ୍କୁ ଧକ୍କା ଦେଇଥିଲା। ଦୁର୍ଘଟଣା ପରେ ଉକ୍ତ ବୋଲେରୋ ଗାଡ଼ିରେ ହିଁ ତାଙ୍କୁ ଗୁରୁତର ଅବସ୍ଥାରେ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ତେବେ ଚିକିତ୍ସାଧୀନ ଅବସ୍ଥାରେ ସେଠାରେ ପୂର୍ଣ୍ଣଚନ୍ଦ୍ରଙ୍କର ମୃତ୍ୟୁ ଘଟିଛି। ଡାକ୍ତରଖାନାରେ ଛାତ୍ରଙ୍କୁ ଛାଡ଼ି ବୋଲେରୋ ଚାଳକ ଜଣକ ଫେରାର ହୋଇଯାଇଥିବା ଜଣାପଡ଼ିଛି। ଏହି ଘଟଣାରେ ରାୟଗଡ଼ା ପୋଲିସ ମାମଲା ରୁଜୁ କରି ତଦନ୍ତ ଜାରି ରଖିଛି।