ଭିଜିଲାନ୍ସ ଜାଲରେ କ୍ୟାପିଟାଲ ହସ୍ପିଟାଲ୍ ଡାକ୍ତର: ଏନଜିଓ କର୍ମଚାରୀଙ୍କ ଦରମା ବିଲ୍ ପାସ୍ ପାଇଁ ୩୦ ହଜାର ଲାଞ୍ଚ ନେଉଥିବା ବେଳେ ଧରାପଡ଼ିଲେ

ଭୁବନେଶ୍ୱର,୧୭/୮(ଓ-ଖବର)- ଓଡ଼ିଶା ଭିଜିଲାନ୍ସ ଜାଲରେ ପଡ଼ିଛନ୍ତି ରାଜଧାନୀ ଭୁବନେଶ୍ୱରସ୍ଥିତ କ୍ୟାପିଟାଲ ହସ୍ପିଟାଲର ଜଣେ ଡାକ୍ତର। ଏକ ଏନଜିଓର କର୍ମଚାରୀଙ୍କ ଦରମା ସାର୍ଟିଫିକେଟ୍ ପ୍ରଦାନ ପାଇଁ ୩୦,୦୦୦ ଟଙ୍କା ଲାଞ୍ଚ ନେଉଥିବା ବେଳେ ଆସିଷ୍ଟାଣ୍ଟ ସର୍ଜନ ଡାକ୍ତର ସତ୍ୟଜିତ ବେହେରାଙ୍କୁ ଭିଜିଲାନ୍ସ ଟିମ୍ ରଙ୍ଗେହାତ ଗିରଫ କରିଛି।

ସୂଚନା ଅନୁଯାୟୀ, କ୍ୟାପିଟାଲ ହସ୍ପିଟାଲର କାଜୁଆଲିଟି ବିଭାଗକୁ ଆସୁଥିବା ଅଜଣା ତଥା ଅସହାୟ ରୋଗୀଙ୍କ ସେବା ଓ ସହାୟତା ପାଇଁ ଏକ ଏନଜିଓ ନିୟୋଜିତ ହୋଇଛି। ଉକ୍ତ ଏନଜିଓ କର୍ମଚାରୀମାନଙ୍କର ୨ ମାସର (ଜୁନ୍ ଓ ଜୁଲାଇ) ଦରମା ଉଠାଣ ନିମନ୍ତେ ୱାର୍କ ସାର୍ଟିଫିକେଟ୍‌ରେ ଦସ୍ତଖତ କରିବା ପାଇଁ ଡାକ୍ତର ବେହେରା ୩୦,୦୦୦ ଟଙ୍କା ଲାଞ୍ଚ ଦାବି କରିଥିଲେ।

ଏନଜିଓର ପ୍ରତିନିଧି ବାରମ୍ବାର ଅନୁରୋଧ କରିବା ସତ୍ତ୍ୱେ ଡାକ୍ତର ଜଣକ ଲାଞ୍ଚ ଟଙ୍କା ନପାଇବା ପର୍ଯ୍ୟନ୍ତ କାର୍ଯ୍ୟ କରିବାକୁ ମନା କରି ହଇରାଣ କରୁଥିଲେ। ବାଧ୍ୟ ହୋଇ ଏନଜିଓ ପକ୍ଷରୁ ଭିଜିଲାନ୍ସ ନିକଟରେ ଅଭିଯୋଗ କରାଯାଇଥିଲା।

ଅଭିଯୋଗ ଆଧାରରେ ଭିଜିଲାନ୍ସ ଏକ ଯୋଜନା ପ୍ରସ୍ତୁତ କରିଥିଲା। ଆଜି ଅଭିଯୋଗକାରୀଙ୍କ ଠାରୁ ୩୦,୦୦୦ ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ ଅଧିକାରୀମାନେ ଡାକ୍ତର ସତ୍ୟଜିତ ବେହେରାଙ୍କୁ କାବୁ କରିଥିଲେ। ତାଙ୍କ ନିକଟରୁ ସମସ୍ତ ଲାଞ୍ଚ ଟଙ୍କା ଜବତ କରାଯାଇଛି। ଟ୍ରାପ୍ ପରେ ଆୟ ବହିର୍ଭୂତ ସମ୍ପତ୍ତି ଠୁଳ (DA) ସନ୍ଦେହରେ ଡାକ୍ତର ବେହେରାଙ୍କ ସହ ଜଡ଼ିତ ୩ଟି ଭିନ୍ନ ଭିନ୍ନ ସ୍ଥାନରେ ଭିଜିଲାନ୍ସ ପକ୍ଷରୁ ଏକକାଳୀନ ଚଢ଼ାଉ ଜାରି ରହିଛି। ଏହି ଘଟଣାରେ ଭୁବନେଶ୍ୱର ଭିଜିଲାନ୍ସ ଥାନାରେ ଦୁର୍ନୀତି ନିବାରଣ ଆଇନ (PC Act, 2018)ର ଧାରା ୭ ଅଧୀନରେ କେସ୍ ନଂ ୧୯ ରୁଜୁ ହୋଇ ତଦନ୍ତ ଚାଲିଛି।