ଲାଞ୍ଚ ନେବା ମାମଲାରେ ବିଡିଏର ପୂର୍ବତନ ସେକ୍ସନ ଅଫିସର ତାରିଣୀ ଚରଣ ଦାସ ଦୋଷୀ ସାବ୍ୟସ୍ତ: ୩ ବର୍ଷ ଜେଲ୍ ଦଣ୍ଡାଦେଶ, ବନ୍ଦ ହେବ ପେନସନ

ଭୁବନେଶ୍ୱର,୧୪/୮(ଓ-ଖବର)- ଦୁର୍ନୀତି ନିବାରଣ କ୍ଷେତ୍ରରେ ଓଡ଼ିଶା ଭିଜିଲାନ୍ସକୁ ପୁଣି ଏକ ବଡ଼ ସଫଳତା ମିଳିଛି। ଲାଞ୍ଚ ନେବା ମାମଲାରେ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ)ର ପୂର୍ବତନ ତଥା ଅବସରପ୍ରାପ୍ତ ସେକ୍ସନ ଅଫିସର ତାରିଣୀ ଚରଣ ଦାସଙ୍କୁ ଭୁବନେଶ୍ୱରର ମାନ୍ୟବର ଅତିରିକ୍ତ ସ୍ୱତନ୍ତ୍ର ଭିଜିଲାନ୍ସ କୋର୍ଟ ଦୋଷୀ ସାବ୍ୟସ୍ତ କରିଛନ୍ତି।

ଅଦାଲତ ଅଭିଯୁକ୍ତଙ୍କୁ ୩ ବର୍ଷର ସଶ୍ରମ କାରାଦଣ୍ଡାଦେଶ ଶୁଣାଇବା ସହ ଆର୍ଥିକ ଜରିମାନା ମଧ୍ୟ ଧାର୍ଯ୍ୟ କରିଛନ୍ତି।

ସୂଚନା ଅନୁଯାୟୀ, ଜଣେ ଆବେଦନକାରୀଙ୍କ ଘରର ମାଲିକାନା ସତ୍ତ୍ୱ ହସ୍ତାନ୍ତର (House Ownership Transfer) କାର୍ଯ୍ୟ ପାଇଁ ବିଡିଏ ଆବଣ୍ଟନ ବିଭାଗର ତତ୍କାଳୀନ ସେକ୍ସନ ଅଫିସର ତାରିଣୀ ଚରଣ ଦାସ ୫,୦୦୦ ଟଙ୍କା ଲାଞ୍ଚ ଦାବି କରି ନେଉଥିଲେ। ଏହି ଘଟଣାରେ ଓଡ଼ିଶା ଭିଜିଲାନ୍ସ ତାଙ୍କ ବିରୋଧରେ ଦୁର୍ନୀତି ନିବାରଣ ଆଇନ, ୧୯୮୮ର ଧାରା ୧୩(୨) ସହ ପଠିତ ୧୩(୧)(ଡି) ଏବଂ ୭ ଅଧୀନରେ ମାମଲା ରୁଜୁ କରି ଚାର୍ଜସିଟ୍ ଦାଖଲ କରିଥିଲା।

ସମସ୍ତ ସାକ୍ଷ୍ୟ ପ୍ରମାଣକୁ ଭିତ୍ତି କରି ମାନ୍ୟବର କୋର୍ଟ ଆଜି ଏହି ଚୂଡ଼ାନ୍ତ ରାୟ ପ୍ରକାଶ କରିଛନ୍ତି।

ଅଦାଲତରେ ଦୋଷୀ ସାବ୍ୟସ୍ତ ହେବା ପରେ, ଅବସରପ୍ରାପ୍ତ ଅଧିକାରୀ ତାରିଣୀ ଚରଣ ଦାସଙ୍କ ପେନସନ ସ୍ଥଗିତ/ବନ୍ଦ କରିବା ନିମନ୍ତେ ଓଡ଼ିଶା ଭିଜିଲାନ୍ସ ବିଭାଗ ପକ୍ଷରୁ ସକ୍ଷମ କର୍ତ୍ତୃପକ୍ଷଙ୍କୁ ଅବଗତ କରାଯାଇ ଆବଶ୍ୟକୀୟ ଆଇନଗତ ପଦକ୍ଷେପ ଗ୍ରହଣ କରାଯିବ ବୋଲି ସୂଚନା ମିଳିଛି।