୧୫ ହଜାର ଟଙ୍କା ଲାଞ୍ଚ ନେବା ବେଳେ ଭିଜିଲାନ୍ସ ଜାଲରେ ଛନ୍ଦି ହେଲେ ବ୍ରହ୍ମପୁର ଜିଲ୍ଲା ମୁଖ୍ୟ କୃଷି ଅଧିକାରୀ
ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନା (MKUY) ଅଧୀନରେ ଏକ ଫାଇଲ୍ ପାସ୍ କରିବା ଏବଂ ସବସିଡି ଟଙ୍କା ମଞ୍ଜୁର କରାଇଦେବା ପାଇଁ ଜଣେ ହିତାଧିକାରୀଙ୍କଠାରୁ ୧୫ ହଜାର ଟଙ୍କା ଲାଞ୍ଚ ନେଉଥିବା ବେଳେ ବ୍ରହ୍ମପୁରର ଜିଲ୍ଲା ମୁଖ୍ୟ କୃଷି ଅଧିକାରୀ (ସିଡିଏଓ) ବ୍ୟୋମକେଶ ମିଶ୍ର ଓଡ଼ିଶା ଭିଜିଲାନ୍ସ ହାତରେ ଧରାପଡ଼ିଛନ୍ତି। ଏହି ଘଟଣା ପରେ ତାଙ୍କର ୩ଟି ଠିକଣାରେ ଭିଜିଲାନ୍ସ ପକ୍ଷରୁ ଚଢ଼ାଉ ଜାରି ରହିଛି।
ବ୍ରହ୍ମପୁର,୧୨/୮(ଓ-ଖବର)- ଲାଞ୍ଚ ନେଉଥିବା ବେଳେ ଆଜି (୧୨ ଅଗଷ୍ଟ ୨୦୨୬) ଓଡ଼ିଶା ଭିଜିଲାନ୍ସ ହାତରେ ଧରାପଡ଼ିଛନ୍ତି ବ୍ରହ୍ମପୁରର ଜିଲ୍ଲା ମୁଖ୍ୟ କୃଷି ଅଧିକାରୀ (ସିଡିଏଓ) ବ୍ୟୋମକେଶ ମିଶ୍ର। ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନା ଅଧୀନରେ ସମନ୍ୱିତ କୃଷି ପ୍ରଣାଳୀ ସମ୍ବନ୍ଧୀୟ ଏକ ଫାଇଲ୍ ଆଗକୁ ବଢ଼ାଇବା ଏବଂ ହିତାଧିକାରୀଙ୍କୁ ସବସିଡି ଅର୍ଥ ମିଳିବାରେ ସାହାଯ୍ୟ କରିବା ପାଇଁ ସେ ୧୫,୦୦୦ ଟଙ୍କା ଲାଞ୍ଚ ଦାବି କରିଥିଲେ। ଆଜି ହିତାଧିକାରୀଙ୍କଠାରୁ ଏହି ଟଙ୍କା ନେଉଥିବା ସମୟରେ ପୂର୍ବ ପ୍ରସ୍ତୁତି ଅନୁଯାୟୀ ଭିଜିଲାନ୍ସ ଟିମ୍ ତାଙ୍କୁ ଧରିଥିଲେ।
ଏହି ଯୋଜନାର ଗାଇଡଲାଇନ ଅନୁଯାୟୀ, କୃଷି ଏବଂ ଭିତ୍ତିଭୂମି ଉପରେ ହୋଇଥିବା ବିନିଯୋଗ ଅର୍ଥର ୫୦ ପ୍ରତିଶତ ସବସିଡି ଭାବରେ ପାଇବାକୁ ଜଣେ ହିତାଧିକାରୀ ଯୋଗ୍ୟ ହୋଇଥାନ୍ତି। ଗତ ଦୁଇ ମାସ ଧରି ଏହି ଫାଇଲ୍ ପାସ୍ କରାଇବା ପାଇଁ ହିତାଧିକାରୀ ଜଣକ ଅଭିଯୁକ୍ତ ସିଡିଏଓ ଶ୍ରୀ ମିଶ୍ରଙ୍କୁ ଅନୁରୋଧ କରି ଆସୁଥିଲେ। ବାରମ୍ବାର ଅନୁରୋଧ ସତ୍ତ୍ୱେ ସେ ଫାଇଲ୍ ପାସ୍ ନକରି ଓଲଟା ୧୫,୦୦୦ ଟଙ୍କା ଲାଞ୍ଚ ମାଗିଥିଲେ। କେବଳ ସେତିକି ନୁହେଁ, ସବସିଡି ଅର୍ଥ ମିଳିବା ବେଳେ ସେଥିରୁ ଏକ ନିର୍ଦ୍ଦିଷ୍ଟ ପ୍ରତିଶତ କମିଶନ ଆକାରରେ ଦେବାକୁ ମଧ୍ୟ ସେ ସର୍ତ୍ତ ରଖିଥିଲେ।
ଅଧିକାରୀଙ୍କ ଏଭଳି ହଇରାଣ ହରକତରେ ଅତିଷ୍ଠ ହୋଇ ହିତାଧିକାରୀ ଜଣକ ଭିଜିଲାନ୍ସ ବିଭାଗର ଦ୍ୱାରସ୍ଥ ହୋଇଥିଲେ। ଏହି ଅଭିଯୋଗକୁ ଭିତ୍ତି କରି ଆଜି ଓଡ଼ିଶା ଭିଜିଲାନ୍ସର ଏକ ଟିମ୍ ଜାଲ ବିଛାଇଥିଲେ। ସିଡିଏଓ ଶ୍ରୀ ମିଶ୍ର ଅଭିଯୋଗକାରୀଙ୍କଠାରୁ ୧୫,୦୦୦ ଟଙ୍କା ନେଲା ବେଳେ ତାଙ୍କୁ ରଙ୍ଗେହାତରେ କାବୁ କରାଯାଇଥିଲା। ଅଭିଯୁକ୍ତଙ୍କ ପାଖରୁ ସମସ୍ତ ଲାଞ୍ଚ ଟଙ୍କା ଉଦ୍ଧାର କରାଯିବା ସହ ଜବତ କରାଯାଇଛି।
ଏହି ଘଟଣା ପରେ ଆୟ ବହିର୍ଭୂତ ସମ୍ପତ୍ତି (DA) ଠୁଳ ଅଭିଯୋଗରେ ଶ୍ରୀ ମିଶ୍ରଙ୍କ ସହ ଜଡ଼ିତ ୩ଟି ବିଭିନ୍ନ ସ୍ଥାନରେ ଏକକାଳୀନ ଭିଜିଲାନ୍ସ ଚଢ଼ାଉ ଜାରି ରହିଛି। ଏହି ପରିପ୍ରେକ୍ଷୀରେ ବ୍ରହ୍ମପୁର ଭିଜିଲାନ୍ସ ପୋଲିସ ଷ୍ଟେସନରେ ପିସି (ସଂଶୋଧନ) ଆଇନ, ୨୦୧୮ର ଧାରା ୭ ଅନୁଯାୟୀ ଏକ ମାମଲା (କେସ୍ ନମ୍ବର- ୦୮, ତାରିଖ: ୧୨.୦୮.୨୦୨୬) ରୁଜୁ କରାଯାଇଛି। ଅଭିଯୁକ୍ତ ସିଡିଏଓ ଶ୍ରୀ ମିଶ୍ରଙ୍କ ବିରୋଧରେ ଅଧିକ ତଦନ୍ତ ଜାରି ରହିଛି। ଆଗକୁ ଏହାର ଏକ ବିସ୍ତୃତ ରିପୋର୍ଟ ପ୍ରକାଶ ପାଇବ।
ଏହି ଖବର ଆପଣଙ୍କୁ ସାହାଯ୍ୟ କଲା କି?