ରାୟଗଡ଼ା ମିଟ୍ସ ଇଞ୍ଜିନିୟରିଂ କଲେଜରେ ଆନ୍ତର୍ଜାତୀୟ ଯୁବ ଦିବସ ପାଳିତ: ଆଇନଗତ ସଚେତନତା ଓ ଯୁବ ସଶକ୍ତୀକରଣ ଉପରେ ଗୁରୁତ୍ୱ

ରାୟଗଡ଼ା,୧୨/୮(ଓ-ଖବର)- ରାୟଗଡ଼ା ଜିଲ୍ଲା କୋଲନରା ବ୍ଲକ ଅନ୍ତର୍ଗତ ଭୁଜବଳ ସ୍ଥିତ ମିଟ୍ସ ଇଞ୍ଜିନିୟରିଂ କଲେଜ ପରିସରରେ ବୁଧବାର ଦିନ ଆନ୍ତର୍ଜାତୀୟ ଯୁବ ଦିବସ ପାଳିତ ହୋଇଯାଇଛି। ନାଲସା ଜାଗୃତି ଯୋଜନା-୨୦୨୫ ଅଧୀନରେ ରାୟଗଡ଼ା ଜିଲ୍ଲା ଆଇନ ସେବା ପ୍ରାଧିକରଣ ର ମିଳିତ ଆନୁକୂଲ୍ୟରେ ଆୟୋଜିତ ଏହି କାର୍ଯ୍ୟକ୍ରମର ଚଳିତ ବର୍ଷର ବିଷୟବସ୍ତୁ "ସଶକ୍ତ ଯୁବକ, ସୁଦୃଢ଼ ଭାରତ" ରଖାଯାଇଥିଲା।

ଯୁବପିଢ଼ିଙ୍କ ମଧ୍ୟରେ ସେମାନଙ୍କର ଆଇନଗତ ଅଧିକାର, ସାମାଜିକ ଦାୟିତ୍ୱବୋଧ ଏବଂ ଏକ ସୁଦୃଢ଼ ତଥା ପ୍ରଗତିଶୀଳ ରାଷ୍ଟ୍ର ଗଠନରେ ସେମାନଙ୍କର ଗୁରୁତ୍ୱପୂର୍ଣ୍ଣ ଭୂମିକା ସମ୍ପର୍କରେ ସଚେତନତା ସୃଷ୍ଟି କରିବା ଥିଲା ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ। ମିଟ୍ସ ଇଞ୍ଜିନିୟରିଂ କଲେଜର ନିର୍ଦ୍ଦେଶକ ଶ୍ରୀ ସି. ଭି. ଗୋପୀନାଥଙ୍କ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ସେ ଛାତ୍ରଛାତ୍ରୀମାନଙ୍କୁ ନିଜର ଅଧିକାର ଓ କର୍ତ୍ତବ୍ୟ ବିଷୟରେ ଅବଗତ କରାଇବା ସହ ସମାଜ ଗଠନରେ ସକ୍ରିୟ ଯୋଗଦାନ କରିବାକୁ ଆହ୍ୱାନ ଦେଇଥିଲେ। ଏହାପରେ ମିଟ୍ସ ଗ୍ରୁପର ଉପାଧ୍ୟକ୍ଷ ଶ୍ରୀ ବିଶ୍ୱଜିତ୍ ପଣ୍ଡା ଯୋଗଦେଇ ରାଷ୍ଟ୍ର ଗଠନରେ ଯୁବଶକ୍ତିର ଆବଶ୍ୟକତା ଉପରେ ଆଲୋକପାତ କରିଥିଲେ। ଯୁବକମାନେ କେବଳ ପେସାଦାର ଦକ୍ଷତା ନୁହେଁ, ବରଂ ସାମାଜିକ ଦାୟିତ୍ୱବୋଧ, ନୈତିକ ମୂଲ୍ୟବୋଧ ଏବଂ ଆଇନଗତ ସଚେତନତା ବିକାଶ କରିବା ଉଚିତ୍ ବୋଲି ସେ ମତବ୍ୟକ୍ତ କରିଥିଲେ।

ରାୟଗଡ଼ାର ବରିଷ୍ଠ ଆଇନଜୀବୀ ଶ୍ରୀ ସୁକାନ୍ତ ଦାଶ ଉପସ୍ଥିତ ରହି ଛାତ୍ର ଓ ଯୁବ ନାଗରିକଙ୍କ ମଧ୍ୟରେ ଆଇନଗତ ସଚେତନତାର ଆବଶ୍ୟକତା ବିଷୟରେ ବହୁମୂଲ୍ୟ ପରାମର୍ଶ ଦେଇଥିଲେ। ଛାତ୍ରଛାତ୍ରୀମାନେ ଦେଶର ଆଇନ ବ୍ୟବସ୍ଥାକୁ ବୁଝିବା ସହ ଆବଶ୍ୟକ ସମୟରେ ଉପଯୁକ୍ତ ଆଇନଗତ ସହାୟତା ନେବାକୁ ସେ ପରାମର୍ଶ ଦେଇଥିଲେ। କାର୍ଯ୍ୟକ୍ରମର ମୁଖ୍ୟ ବକ୍ତା ଭାବେ ରାୟଗଡ଼ା ଜିଲ୍ଲା ଆଇନ ସେବା ପ୍ରାଧିକରଣ ର ସମ୍ପାଦକ ତଥା ଓଜେଏସ ସୁବ୍ରତ ଆଚାର୍ଯ୍ୟ ଯୋଗ ଦେଇଥିଲେ। ନିଜର ତଥ୍ୟମୂଳକ ତଥା ଆକର୍ଷଣୀୟ ବକ୍ତବ୍ୟରେ ସେ ଆଇନର ମୌଳିକ ଧାରଣା, ଯୁବକମାନଙ୍କର ମୌଳିକ ଆଇନଗତ ଅଧିକାର, ନାଗରିକଙ୍କ ଆଇନଗତ କର୍ତ୍ତବ୍ୟ ଏବଂ ଡିଏଲ୍‌ଏସ୍‌ଏ ଓ ନାଲସାର କାର୍ଯ୍ୟଶୈଳୀ ଉପରେ ବିସ୍ତୃତ ଆଲୋଚନା କରିଥିଲେ। ଆର୍ଥିକ ଅନଗ୍ରସର ଲୋକଙ୍କୁ ମାଗଣାରେ କିପରି ସହଜରେ ନ୍ୟାୟ ମିଳିପାରିବ ସେ ଦିଗରେ ଏହି ସଂସ୍ଥାଗୁଡ଼ିକ କିପରି କାମ କରୁଛନ୍ତି, ତାହା ସେ ବୁଝାଇଥିଲେ। ଦେଶର ଭବିଷ୍ୟତ ଗଠନରେ ଯୁବସମାଜ ହେଉଛି ସବୁଠାରୁ ଗୁରୁତ୍ୱପୂର୍ଣ୍ଣ ଶକ୍ତି ବୋଲି ଶ୍ରୀ ଆଚାର୍ଯ୍ୟ ଦର୍ଶାଇଥିଲେ। ସମାଜ ଓ ଦେଶର ବିକାଶ ପାଇଁ ନିଜର ଜ୍ଞାନ, କୌଶଳ, ନୂତନ ଚିନ୍ତାଧାରା ଓ ଶକ୍ତିର ସକାରାତ୍ମକ ବ୍ୟବହାର କରିବାକୁ ସେ ଛାତ୍ରଛାତ୍ରୀମାନଙ୍କୁ ଉତ୍ସାହିତ କରିଥିଲେ। ଏକ ସଶକ୍ତ ଓ ଆଇନଗତ ଭାବେ ସଚେତନ ଯୁବସମାଜ ଦେଶକୁ ଏକ ସୁଦୃଢ଼ ଏବଂ ଦାୟିତ୍ୱବାନ ଭାରତରେ ପରିଣତ କରିବାରେ ବିଶେଷ ସହାୟକ ହେବ ବୋଲି ସେ ଗୁରୁତ୍ୱାରୋପ କରିଥିଲେ। ଏହି କାର୍ଯ୍ୟକ୍ରମରେ ମିଟ୍ସ ଇଞ୍ଜିନିୟରିଂ କଲେଜର ଅଧ୍ୟାପକ, ଅଧ୍ୟାପିକା ଓ ଛାତ୍ରଛାତ୍ରୀମାନେ ଅତ୍ୟନ୍ତ ଉତ୍ସାହର ସହିତ ଅଂଶଗ୍ରହଣ କରିଥିଲେ। ଏହି ଆଲୋଚନା ମାଧ୍ୟମରେ ଛାତ୍ରଛାତ୍ରୀମାନେ ଦେଶର ଆଇନ ବ୍ୟବସ୍ଥା ତଥା ଜଣେ ସଚେତନ ନାଗରିକ ଭାବରେ ସେମାନଙ୍କର କର୍ତ୍ତବ୍ୟ ସମ୍ପର୍କରେ ଜାଣିବାର ସୁଯୋଗ ପାଇଥିଲେ। ଛାତ୍ରଛାତ୍ରୀଙ୍କ ମଧ୍ୟରେ ସଚେତନତା ସୃଷ୍ଟି କରିଥିବାରୁ ଜିଲ୍ଲା ଆଇନ ସେବା ପ୍ରାଧିକରଣର ଅଧିକାରୀମାନଙ୍କୁ ଶେଷରେ ଧନ୍ୟବାଦ ଅର୍ପଣ କରାଯାଇଥିଲା। ବିଦ୍ୟାର୍ଥୀମାନଙ୍କ ମଧ୍ୟରେ କେବଳ ଶୈକ୍ଷିକ ଓ ପେସାଦାର ଉତ୍କର୍ଷତା ନୁହେଁ, ବରଂ ଆଇନଗତ ସଚେତନତା, ସାମାଜିକ ଦାୟିତ୍ୱବୋଧ, ଏବଂ ନୈତିକ ମୂଲ୍ୟବୋଧ ସୃଷ୍ଟି ପାଇଁ ରାୟଗଡ଼ା ମିଟ୍ସ ଇଞ୍ଜିନିୟରିଂ କଲେଜ ପକ୍ଷରୁ ନିଜର ପ୍ରତିଶ୍ରୁତିବଦ୍ଧତାକୁ ଦୋହରାଯାଇଥିଲା।