ମିଟ୍ସ ରାୟଗଡ଼ାରେ ଇଣ୍ଡିଆନ୍ ବିଲ୍ଡିଂ କଂଗ୍ରେସର ବୈଷୟିକ ଅଧିବେଶନ: 'ନିର୍ମିତ ପରିବେଶରେ ଗୁଣବତ୍ତା ଓ ମାନଦଣ୍ଡ' ଉପରେ ଆଲୋଚନା

ରାୟଗଡ଼ା,୮/୮(ଓ-ଖବର)- ରାୟଗଡ଼ା ଜିଲ୍ଲା କୋଲନରା ବ୍ଲକ୍ ଭୁଜବଳ ସ୍ଥିତ ମଝିଘରିଆଣି ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି ଆଣ୍ଡ ସାଇନ୍ସ (ମିଟ୍ସ) ପରିସରରେ ଇଣ୍ଡିଆନ୍ ବିଲ୍ଡିଂ କଂଗ୍ରେସ (ଓଡ଼ିଶା ଚାପ୍ଟର), ରାୟଗଡ଼ା ରାସ୍ତା ଓ କୋଠାବାଡ଼ି ବିଭାଗର ମୁଖ୍ୟ ନିର୍ମାଣକାରୀ ଇଞ୍ଜିନିୟର ଏବଂ ମିଟ୍ସର ମିଳିତ ସହଯୋଗରେ ୯ମ ସର୍କଲ ସ୍ତରୀୟ ବୈଷୟିକ ଅଧିବେଶନ ଆଜି ଅନୁଷ୍ଠିତ ହୋଇଯାଇଛି।

ଇଣ୍ଡିଆନ୍ ବିଲ୍ଡିଂ କଂଗ୍ରେସ ହେଉଛି ଏକ ପ୍ରତିଷ୍ଠିତ ଜାତୀୟ ବୃତ୍ତିଗତ ସଂସ୍ଥା, ଯାହା କୋଠା ଏବଂ ଭିତ୍ତିଭୂମିର ଯୋଜନା, ଡିଜାଇନ୍, ନିର୍ମାଣ, ରକ୍ଷଣାବେକ୍ଷଣ ଏବଂ ପରିଚାଳନାରେ ଉତ୍କର୍ଷତାକୁ ପ୍ରୋତ୍ସାହିତ କରିବା ପାଇଁ ପ୍ରତିବଦ୍ଧ। ଏହା ଇଞ୍ଜିନିୟର, ସ୍ଥପତି, ଯୋଜନାକାରୀ, ଶିକ୍ଷାବିତ୍, ଗବେଷକ, ନୀତି ନିର୍ଦ୍ଧାରକ ଏବଂ ଶିଳ୍ପ ବିଶେଷଜ୍ଞମାନଙ୍କୁ ଜ୍ଞାନ ଆଦାନପ୍ରଦାନ କରିବା ସହ ଉଦୀୟମାନ ଆହ୍ୱାନଗୁଡ଼ିକ ଉପରେ ଆଲୋଚନା ଓ ସ୍ଥାୟୀ ଭିତ୍ତିଭୂମି ବିକାଶ ନିମନ୍ତେ ନବସୃଜନକୁ ଉତ୍ସାହିତ କରିବା ପାଇଁ ଏକ ସାଧାରଣ ମଞ୍ଚ ପ୍ରଦାନ କରେ।

ଏହି ଅବସରରେ ମିଟ୍ସ ଅନୁଷ୍ଠାନର ମୁଖ୍ୟ କାର୍ଯ୍ୟ ନିର୍ବାହୀ ଅଧିକାରୀ (ସିଇଓ) ଡ. ଶ୍ରୀରାମ ପଣ୍ଡା ମତବ୍ୟକ୍ତ କରିଥିଲେ ଯେ, ଏଭଳି ପ୍ରତିଷ୍ଠିତ ସେମିନାର ଆୟୋଜନ ପାଇଁ ମିଟ୍ସ ଅନୁଷ୍ଠାନକୁ ମନୋନୀତ କରାଯାଇଥିବାରୁ ଏହା ସେମାନଙ୍କ ପାଇଁ ଗର୍ବ ଏବଂ ସୌଭାଗ୍ୟର ବିଷୟ। "ନିର୍ମିତ ପରିବେଶରେ ଗୁଣବତ୍ତା ଏବଂ ମାନଦଣ୍ଡ" ଶୀର୍ଷକ ଉପରେ ଆଜିର ଅଧିବେଶନ ଆୟୋଜିତ ହୋଇଥିଲା। ନିର୍ମାଣ ଏବଂ ଭିତ୍ତିଭୂମି କ୍ଷେତ୍ରର ଉନ୍ନତି ପାଇଁ ବୈଷୟିକ ଉତ୍କର୍ଷତା, ବୃତ୍ତିଗତ ସହଯୋଗ ଏବଂ ଜ୍ଞାନର ପ୍ରସାର ଦିଗରେ ଇଣ୍ଡିଆନ୍ ବିଲ୍ଡିଂ କଂଗ୍ରେସ ନିରନ୍ତର କାର୍ଯ୍ୟ କରୁଥିବା ନେଇ ଏଠାରେ ଆଲୋଚନା ହୋଇଥିଲା।

ରାୟଗଡ଼ାର ରାସ୍ତା ଏବଂ କୋଠାବାଡ଼ି ବିଭାଗର ମୁଖ୍ୟ ନିର୍ମାଣ ଇଞ୍ଜିନିୟର ଆଶିଷ କୁମାର ନାୟକ ସ୍ୱାଗତ ଭାଷଣ ଦେବା ସହ ଅତିଥିମାନଙ୍କ ପରିଚୟ ପ୍ରଦାନ କରିଥିଲେ। ଏହି ଅଧିବେଶନରେ ଅନ୍ୟମାନଙ୍କ ମଧ୍ୟରେ ମିଟ୍ସ ଗ୍ରୁପର ସିଇଓ ଡ. ଶ୍ରୀରାମ ପଣ୍ଡା, ଇଣ୍ଡିଆନ୍ ବିଲ୍ଡିଂ କଂଗ୍ରେସର ଉପ-ଅଧ୍ୟକ୍ଷ ପ୍ରଭାତ କୁମାର ପାଢ଼ୀ ଏବଂ ଉପ-ସଭାପତି ବିଜୟ ଚନ୍ଦ୍ର ତ୍ରିପାଠୀ ପ୍ରମୁଖ ଅତିଥି ରୂପେ ଯୋଗଦେଇଥିଲେ।

ବୈଷୟିକ ଅଧିବେଶନରେ ପୂର୍ବତନ ଇଆଇସି ଇଞ୍ଜିନିୟର ଦୁଃଖବନ୍ଧୁ ବେହେରା ଏବଂ ରାସ୍ତା ଓ କୋଠାବାଡ଼ି ବିଭାଗର ପୂର୍ବତନ ଏସ୍.ଇ. ବିମଳ ଦାଶ ଆଲୋଚନା କରିଥିଲେ। ଅନ୍ୟ ଏକ ଅଧିବେଶନରେ ପ୍ରମୋଦ କୁମାର ନାୟକ, ବି.ସି. ତ୍ରିପାଠୀ ଏବଂ ଏମ୍.ଆର୍. ମିଶ୍ର ପ୍ରମୁଖ ବିଭିନ୍ନ ସନ୍ଦର୍ଭ ଉପରେ ନିଜର ମତ ରଖିଥିଲେ। ପରିଶେଷରେ ମିଟ୍ସ ଗ୍ରୁପର ନିର୍ଦ୍ଦେଶକ ପ୍ରଫେସର ସି.ଭି. ଗୋପୀନାଥ ଧନ୍ୟବାଦ ଅର୍ପଣ କରିଥିଲେ।