ଭୁଲ୍ ଇଞ୍ଜେକ୍ସନ ନେଲା ଜୀବନ: ଚାନ୍ଦିଲିରେ ମହିଳାଙ୍କ ମୃତ୍ୟୁ, ମେଡ଼ିସିନ୍ ଷ୍ଟୋର୍ କର୍ମଚାରୀ ଅଟକ
ରାୟଗଡ଼ା ଜିଲ୍ଲା ଚାନ୍ଦିଲି ଅଞ୍ଚଳରେ ଏକ ମେଡ଼ିସିନ୍ ଷ୍ଟୋରରେ ଭୁଲ୍ ଇଞ୍ଜେକ୍ସନ ନେବା ଯୋଗୁଁ ୫୫ ବର୍ଷୀୟା ମହିଳା ବୈଦେହୀ କୁମାରଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି। ପରିବାର ଲୋକଙ୍କ ଅଭିଯୋଗ କ୍ରମେ ଚାନ୍ଦିଲି ପୋଲିସ ମେଡ଼ିସିନ୍ ଷ୍ଟୋର୍ କର୍ମଚାରୀଙ୍କୁ ଅଟକ ରଖି ତଦନ୍ତ କରୁଛି।
ଭୁଲ୍ ଇଞ୍ଜେକ୍ସନ ଯୋଗୁଁ ମହିଳାଙ୍କ ମୃତ୍ୟୁ ଅଭିଯୋଗ
ରାୟଗଡ଼ା, ୭/୮ (ଓ-ଖବର)- ଜଣେ ମହିଳାଙ୍କୁ ଭୁଲ୍ ଇଞ୍ଜେକ୍ସନ ଦେବା ଫଳରେ ତାଙ୍କର ମୃତ୍ୟୁ ହୋଇଥିବା ନେଇ ଚାନ୍ଦିଲି ଥାନାରେ ଅଭିଯୋଗ ହୋଇଛି। ମୃତକ ଜଣକ ହେଲେ ଚାନ୍ଦିଲି ଥାନା ଅନ୍ତର୍ଗତ ଗେଟିପଡ଼ା ଅଞ୍ଚଳର ବୈଦେହୀ କୁମାର (୫୫ ବର୍ଷ)।
ସୂଚନା ଅନୁଯାୟୀ, ମୃତ ବୈଦେହୀଙ୍କୁ କିଛି ଦିନ ହେବ ଥଣ୍ଡା ଓ ଜ୍ୱର ହୋଇଥିଲା। ଔଷଧ ଖାଇବା ପରେ ମଧ୍ୟ ଭଲ ନହେବାରୁ ଗତକାଲି ସେ ଚାନ୍ଦିଲି ଅଞ୍ଚଳର ଏକ ମେଡ଼ିସିନ୍ ଷ୍ଟୋରକୁ ଯାଇଥିଲେ। ସେଠାରେ କାର୍ଯ୍ୟରତ କର୍ମଚାରୀ ଏ.କେ. ଭଦ୍ରା ତାଙ୍କୁ ଏକ ଇଞ୍ଜେକ୍ସନ ଦେଇଥିଲେ। ଇଞ୍ଜେକ୍ସନ ନେବାର କିଛି ସମୟ ପରେ ପାର୍ଶ୍ୱ ପ୍ରତିକ୍ରିୟା (ସାଇଡ୍ ଇଫେକ୍ଟ) ଯୋଗୁଁ ମହିଳା ଜଣକ ଗୁରୁତର ହୋଇପଡ଼ିଥିଲେ। ତାଙ୍କୁ ତୁରନ୍ତ ରାୟଗଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଉଥିବା ସମୟରେ ବାଟରେ ତାଙ୍କର ମୃତ୍ୟୁ ହୋଇଯାଇଥିଲା। ଏନେଇ ପରିବାରବର୍ଗ ଚାନ୍ଦିଲି ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ଚାନ୍ଦିଲି ପୋଲିସ ଉକ୍ତ ମେଡ଼ିସିନ୍ ଷ୍ଟୋରର କର୍ମଚାରୀ ଏ.କେ. ଭଦ୍ରାଙ୍କୁ ଅଟକ ରଖି ଘଟଣାର ତଦନ୍ତ ଜାରି ରଖିଛି।
ଏହି ଖବର ଆପଣଙ୍କୁ ସାହାଯ୍ୟ କଲା କି?