ବନ୍ୟା ପ୍ରଭାବିତଙ୍କ ପାଇଁ ମୁଖ୍ୟମନ୍ତ୍ରୀଙ୍କ ବଡ଼ ଘୋଷଣା: ପ୍ରାରମ୍ଭିକ ପର୍ଯ୍ୟାୟରେ ମିଳିବ ୧୧୦ କୋଟି ଟଙ୍କାର ସହାୟତା ପ୍ୟାକେଜ୍

ଭୁବନେଶ୍ୱର,୩/୮(ଓ-ଖବର)- ରାଜ୍ୟରେ ସୃଷ୍ଟି ହୋଇଥିବା ଭୟାବହ ବନ୍ୟା ପରିସ୍ଥିତିର ମୁକାବିଲା ଓ ପ୍ରଭାବିତ ଲୋକଙ୍କୁ ତୁରନ୍ତ ସହାୟତା ଯୋଗାଇଦେବା ପାଇଁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏକ ବଡ଼ ପଦକ୍ଷେପ ନେଇଛନ୍ତି। ବନ୍ୟା ପ୍ରଭାବିତଙ୍କ ପାଇଁ ପ୍ରାରମ୍ଭିକ ପର୍ଯ୍ୟାୟରେ ୧୧୦ କୋଟି ଟଙ୍କାର ସହାୟତା ପ୍ୟାକେଜ୍ ଘୋଷଣା କରାଯାଇଛି। ଆକାଶମାର୍ଗରୁ ବନ୍ୟାଞ୍ଚଳ ଅନୁଧ୍ୟାନ କରିବା ପରେ ମୁଖ୍ୟମନ୍ତ୍ରୀ କ୍ଷତିଗ୍ରସ୍ତଙ୍କୁ ତୁରନ୍ତ ଏହି ସହାୟତା ରାଶି ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି। ଏହା ପୂର୍ବରୁ ରିଲିଫ୍ ଓ ଉଦ୍ଧାର କାର୍ଯ୍ୟ ପାଇଁ ଅତ୍ୟଧିକ ପ୍ରଭାବିତ ଜିଲ୍ଲାଗୁଡ଼ିକୁ ୨୬ କୋଟି ଟଙ୍କାର ଅଗ୍ରୀମ ସହାୟତା ଦିଆଯାଇଥିଲା।

କ୍ଷୟକ୍ଷତିର ପ୍ରକାରସହାୟତା ରାଶି

ସମ୍ପୂର୍ଣ୍ଣ କ୍ଷତିଗ୍ରସ୍ତ ବାସଗୃହ (ମରାମତି ପାଇଁ)୧,୨୦,୦୦୦ ଟଙ୍କା

ଆଂଶିକ କ୍ଷତିଗ୍ରସ୍ତ ପକ୍କା ଘର୬,୫୦୦ ଟଙ୍କା

ଆଂଶିକ କ୍ଷତିଗ୍ରସ୍ତ କଚ୍ଚା ଘର୪,୦୦୦ ଟଙ୍କା

ଭାଙ୍ଗିଯାଇଥିବା କୁଡ଼ିଆ ଘର୮,୦୦୦ ଟଙ୍କା

ଗୁହାଳ ଘର କ୍ଷତିଗ୍ରସ୍ତ୩,୦୦୦ ଟଙ୍କା

ଚାଷୀଙ୍କ ପାଇଁ ଫସଲ କ୍ଷୟକ୍ଷତି ସହାୟତା

ଅଣଜଳସେଚିତ ଅଞ୍ଚଳ: ହେକ୍ଟର ପିଛା ୮,୫୦୦ ଟଙ୍କା

ଜଳସେଚିତ ଜମି: ହେକ୍ଟର ପିଛା ୧୭,୦୦୦ ଟଙ୍କା

ବାରମାସୀ ଫସଲ/ଉଦ୍ୟାନ କୃଷି: ହେକ୍ଟର ପିଛା ୨୨,୫୦୦ ଟଙ୍କା

ଗୃହପାଳିତ ପଶୁଧନ କ୍ଷୟକ୍ଷତି ସହାୟତା

ଦୁଧିଆଳୀ ପଶୁ (ଗାଈ, ମଇଁଷି): ମୁଣ୍ଡ ପିଛା ୩୭,୫୦୦ ଟଙ୍କା

ଭାରବାହୀ ପଶୁ (ବଳଦ, ମଇଁଷି, ଘୋଡ଼ା): ମୁଣ୍ଡ ପିଛା ୩୨,୦୦୦ ଟଙ୍କା

ବାଛୁରୀ, ଗଧ ଓ ଖଚର: ମୁଣ୍ଡ ପିଛା ୨୦,୦୦୦ ଟଙ୍କା

ଛେଳି ବା ମେଣ୍ଢା: ମୁଣ୍ଡ ପିଛା ୪,୦୦୦ ଟଙ୍କା

ବନ୍ୟା ସ୍ଥିତି ଓ ପ୍ରଶାସନିକ ପଦକ୍ଷେପ

ଚଳିତ ବନ୍ୟାରେ ରାଜ୍ୟର ୨୨ଟି ଜିଲ୍ଲାର ୮୫ଟି ବ୍ଲକ୍, ୧୫ଟି ପୌରାଞ୍ଚଳ ଓ ୧୪୫୮ଟି ଗ୍ରାମର ପ୍ରାୟ ୮.୬୩ ଲକ୍ଷ ଲୋକ ପ୍ରଭାବିତ ହୋଇଛନ୍ତି। ପ୍ରାରମ୍ଭିକ ଆକଳନ ଅନୁଯାୟୀ ୩୫୬୭ଟି ଘର କ୍ଷତିଗ୍ରସ୍ତ ହୋଇଥିବା ବେଳେ ୩୩,୪୫୮ ହେକ୍ଟରରୁ ଅଧିକ ଚାଷଜମି ପ୍ରଭାବିତ ହୋଇଛି। ସତର୍କତାମୂଳକ ପଦକ୍ଷେପ ସ୍ୱରୂପ ପ୍ରାୟ ୨.୬୭ ଲକ୍ଷ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ପ୍ରଭାବିତ ଅଞ୍ଚଳଗୁଡ଼ିକରେ ୫୨୯ଟି ରିଲିଫ୍ ଶିବିର ଓ ୩୧ଟି ପଶୁ ଶିବିର କାର୍ଯ୍ୟକ୍ଷମ ରହିଛି। ବର୍ତ୍ତମାନ ବାଲେଶ୍ୱର, ଭଦ୍ରକ ଓ ଯାଜପୁର ଜିଲ୍ଲାରେ ଯୁଦ୍ଧକାଳୀନ ଭିତ୍ତିରେ ରିଲିଫ୍ ଓ ପୁନର୍ବାସ କାର୍ଯ୍ୟ ଜାରି ରହିଛି ବୋଲି ରାଜ୍ୟ ସରକାରଙ୍କ ପକ୍ଷରୁ ସ୍ପଷ୍ଟ କରାଯାଇଛି।