ବାଲେଶ୍ୱର: ୩୭.୩୨ ଲକ୍ଷ ଟଙ୍କା ହଡ଼ପ ମାମଲାରେ ବିଇଓ ଅଫିସର ପ୍ରାକ୍ତନ କନିଷ୍ଠ ସହାୟକ ଗିରଫ

ବାଲେଶ୍ୱର,୧/୮(ଓ-ଖବର): ସରକାରୀ ଅର୍ଥ ହଡ଼ପ ମାମଲାରେ ଓଡ଼ିଶା ଭିଜିଲାନ୍ସକୁ ବଡ଼ ସଫଳତା। ବାଲେଶ୍ୱର ଜିଲ୍ଲା ବାଲିଆପାଳ ବିଇଓ (BEO) କାର୍ଯ୍ୟାଳୟର ପ୍ରାକ୍ତନ କନିଷ୍ଠ ସହାୟକ ଦେବଦ୍ୟୁତି ନନ୍ଦଙ୍କୁ ଗିରଫ କରିଛି ଭିଜିଲାନ୍ସ। ତାଙ୍କ ବିରୋଧରେ ୩୭,୩୨,୭୦୮ ଟଙ୍କାର ସରକାରୀ ଅର୍ଥ ଆତ୍ମସାତ୍‌ କରିଥିବା ଅଭିଯୋଗ ହୋଇଛି। (ସେ ବର୍ତ୍ତମାନ ବାଲିଆପାଳ ଜଗାଇସ୍ଥିତ ପଦ୍ମଲୋଚନ ସରକାରୀ ହାଇସ୍କୁଲରେ କନିଷ୍ଠ ସହାୟକ ଭାବେ କାର୍ଯ୍ୟରତ ଥିଲେ)।

କିପରି ହେଉଥିଲା ଅର୍ଥ ହେରଫେର?

ଅଭିଯୁକ୍ତ ଦେବଦ୍ୟୁତି ନନ୍ଦ ବାଲିଆପାଳ ବିଇଓ ଅଫିସରେ ବିଲ୍ କ୍ଲର୍କ-କମ୍-ଆକାଉଣ୍ଟାଣ୍ଟ ଭାବେ କାର୍ଯ୍ୟ କରୁଥିବା ସମୟରେ ନିଜ ପଦବୀର ଦୁରୁପଯୋଗ କରିଥିଲେ। ୨୦୨୨ ରୁ ୨୦୨୬ ମସିହା ମଧ୍ୟରେ ଅନ୍ୟ କର୍ମଚାରୀମାନଙ୍କର ବକେୟା ମହଙ୍ଗା ଭତ୍ତା (DA) ବିଲ୍ ପ୍ରସ୍ତୁତ ବେଳେ, ଚଞ୍ଚକତା ପୂର୍ବକ ନିଜର ଜାଲ୍ ବକେୟା ଦରମା (Arrear Pay Bill) ସେଥିରେ ସାମିଲ କରି ବିପୁଳ ପରିମାଣର ସରକାରୀ ଅର୍ଥ ହଡ଼ପ କରିଥିଲେ।

କୋର୍ଟ ଚାଲାଣ ଓ ମାମଲା ରୁଜୁ

ଏହି ସମ୍ପର୍କରେ ବାଲେଶ୍ୱର ଭିଜିଲାନ୍ସ ଥାନାରେ ମାମଲା ନଂ ୧୩/୨୦୨୬ ରୁଜୁ କରାଯାଇଛି। ଅଭିଯୁକ୍ତଙ୍କ ବିରୋଧରେ PC (Amendment) Act, 2018 ର Section 13(2) r/w 13(1)(a) ଏବଂ IPC ର Section 467, 468, 471, ଓ 477-A ଅଧୀନରେ କେସ୍ ଦାୟର ହୋଇଛି। ଆଜି ଅଭିଯୁକ୍ତ ନନ୍ଦଙ୍କୁ କୋର୍ଟ ଚାଲାଣ କରାଯାଇଥିବା ବେଳେ ଘଟଣାର ଅଧିକ ତଦନ୍ତ ଜାରି ରହିଛି।