ମାଝିଗୁଡ଼ା ଠାରେ ବିଜେପିର ମଣ୍ଡଳସ୍ତରୀୟ ବୈଠକ, ଦଳକୁ ମଜବୁତ କରିବା ଉପରେ ଗୁରୁତ୍ୱ

କଲ୍ୟାଣସିଂହପୁର,୧/୮(ଓ-ଖବର)- ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ୍ ଅନ୍ତର୍ଗତ ମାଝିଗୁଡ଼ା ମଣ୍ଡଳ ଠାରେ ଭାରତୀୟ ଜନତା ପାର୍ଟି (ବିଜେପି) ର ଏକ ଗୁରୁତ୍ୱପୂର୍ଣ୍ଣ ମଣ୍ଡଳସ୍ତରୀୟ ସାଙ୍ଗଠନିକ ବୈଠକ ଅନୁଷ୍ଠିତ ହୋଇଯାଇଛି। ମଣ୍ଡଳ ସଭାପତି ଅନିଲ ଜାଡ଼ିଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକରେ ଆଗାମୀ ଦିନରେ ଦଳୀୟ ସଙ୍ଗଠନକୁ କିଭଳି ଆହୁରି ମଜବୁତ ଓ କ୍ରିୟାଶୀଳ କରାଯିବ, ସେନେଇ ବ୍ୟାପକ ଆଲୋଚନା କରାଯାଇଛି। ଏହି କାର୍ଯ୍ୟକ୍ରମରେ ବିଜେପିର ପୂର୍ବତନ ଜିଲ୍ଲା ସଭାପତି ଶିବ ଶଙ୍କର ଉଲାକା ଯୋଗଦେଇ କର୍ମୀମାନଙ୍କୁ ଦଳୀୟ ରଣନୀତି ଓ ଆଗାମୀ କାର୍ଯ୍ୟପନ୍ଥା ସମ୍ପର୍କରେ ମାର୍ଗଦର୍ଶନ କରିଥିଲେ। ବିଶେଷ କରି ସଙ୍ଗଠନକୁ କିଭଳି ତୃଣମୂଳସ୍ତରରୁ ସଂଗଠିତ କରାଯିବ ଏବଂ ଦଳର ବିଚାରଧାରା ଓ ଜନକଲ୍ୟାଣକାରୀ ଯୋଜନାଗୁଡ଼ିକୁ ଲୋକଙ୍କ ପାଖରେ ପହଞ୍ଚାଯିବ, ସେ ଉପରେ ସେ ଆଲୋକପାତ କରିଥିଲେ। ଏହି ବୈଠକରେ ମଣ୍ଡଳର ବିଭିନ୍ନ ପଦାଧିକାରୀ, ପଞ୍ଚାୟତ ସ୍ତରୀୟ ନେତୃବୃନ୍ଦ ଏବଂ ସକ୍ରିୟ କର୍ମୀମାନେ ଉପସ୍ଥିତ ରହି ଦଳୀୟ ସଙ୍ଗଠନର ବିକାଶ ଓ ସୁଦୃଢ଼ୀକରଣ ନିମନ୍ତେ ଆଲୋଚନାରେ ଭାଗ ନେଇଥିଲେ।